نافذة على العالم

كان ياما كان فى قديم الزمان جدتى تقعد جنب صور البلاكونة ساعة العصارى ومعاها كوباية الشاى وآخر مزاج ولما جدى كان يشوفها يقوم يوقولها بتعملى ايه عندك تقوم تقوله بشوف أخبار الدنيا فيقوم جدى يجيب كوباية الشاى بتاعته ويقعد جنبها ويقولها ايه الأخبار النهاردة فتحكيله عن ابن أم فتحى اللى خلص الجيش وحسن ابن أم عايدة اللى كان زعيقه جايب آخر الشارع وأبو وداد اللى طول اليوم واقف يسقى قصارى الزرع بتوعه ولا كأنهم كام فدان ، وأبوليلى يا كبدى اللى محتاس بعياله من يوم المرحومه ما راحت ومش راضى لحد دلوقتى يدخل عليهم مرات أب ، وهكذا كانت ترص جدتى نشرةأخبار الدنيا بتاعتهم لجدى كل يوم العصريه ،وبعدين وبعديها بشوية سنيين كان يرجع والدى من شغله بالليل "مش زى جدى بعد العصر" ولما كان الوالد بيرجع حوالى الساعة سابعة تامنية كان يتغدى بأثر رجعى ويجيب هو كوباية الشاى ويقعد قدام نشرة تسعة وينده على الوالدة علشان يشوفوا أخبار الدنيا فيقوموا يشوفوا كام قتيل على كام جريح فى حروب الدنيا اللى ما بتخلصش وكام رئيس على كام وزير بيشجبوا ويدينوا فى احتجاجات الدنيا اللى ما بتخلصش وكام تصريح بتصليح الأحوال اللى ما بتتصلحش،" وده كله طبعا من وجهة نظر بلدنا ومسؤلينا احنا بس"،وتفوت السنيين وتمر وتتغير الدنيا وتتطور وما يبقاش لمسؤلينا سلطة مطلقة على معارفنا ،ويرجع جوزى من الشغل كل يوم فى ميعادوبعد الغدا أو العشا أو السحور نقعد احنا اللتنين قدام الأنترنت علشان نعرف أخبار الدنيا اللى على كيفنا احنا وبمزاجنا احنا مش بس أخبار الكام جار اللى حوالينا سواء كانوا بشر أو دول ، دلوقتى ممكن ادور على أى موضوع يهمنى ، فى الكورة فى علوم الفضاء فى الفن التشكيلى ماحدش بيفرض علىَ اهتماماته ولا وجهة نظره الشخصية ولأن الانسان كائن فضولى بطبعة ساعات ندخل على مواقع ما نعرفهاش ،منتديات، مواقع دردشة ،مدونات ،حاجات كتيرة ما نكنش بندور فيها على حاجة بعينها لكن نبقى سمعنا عنها من حد وعاوزين نعرف المواقع دى بيعملوا فيها ايه بالظبط ،حب استطلاع يعنى،ومن أشهر الحاجات دى كان الفيس بوك،وده طبعا غنى عن التعريف ،لكن فى الحقيقة أنا وجوزى ما كناش نعرفه ،لأننا كنا دايما مشغولين بحاجات من نوع تانى، حاجات فى مجال اهتماماتنا أو شغلنا ،أما المدعو فيس بوك ما قابلناش فى أى من مجال اهتمامتنا بالصدفة ،لكن طوب الأرض أيوة الله طوب الأرض كان بيحكى لنا عنه ،مش مجرد تيجى سيرته والسلام لأ دول فهمونا ان عدم معرفتنا بيه منتهى التأخر والرجعية فى عالم النت ،طبعا احنا ما سكتناش قلنا لازم نعرف ايه البتاع ده اللى مخلينا شكلنا وحش قدام الناس ،القصد دخلنا الفيس بوك وسجلنا فيه ،وبعدين اتفاجئنا بحاجات غريبة ،والشهادة لله هو مش الفيس بوك لوحده اللى طلع فيه حاجات غريبة ،ده فى مواقع تانيه كتيرة الناس بتدخلها علشان تتريق على بعضها أو تهزر أو تتخانق أيوة الله تتخانق ده أنا شفت العجب ، بقى كل اللى احنا استفدناه من ثورة المعلومات شوية شكل للبيع بنوزعهم على بعضينا؟! ده طبعا غير المواقع الإباحية ودى مش شرط تبقى أفلام ولا صور من إياها ، ممكن قوى تبقى اسكتشات بيعملها شباب موهوب ، فعلا هو شباب موهوب ومغمور وكمان عنده وجهة نظر ، لكن لازم يعنى يقدم وجهة نظرة دى من خلال تريقة فجة وكلمات خارجة ؟ليه الأفورة دى بس ؟ للأسف ان كل شىء فى الدنيا سلاح ذو حدين ،واحنا هنا دايما بندور على الحد اللى يعورنا مش اللى ينصرنا، وثورة المعلومات اللى ممكن نغير بيها واقعنا المر ، ونستغلها لأنفع الأشياء فى الدنيا ، جت لحد عندنا وبقت مجرد ثورة اتصالات نتصل بكل الناس اللى فى أخر الدنيا واللى فى أولها ، لكن عشان ايه بقى ؟ عشان نهزر ونرزل على بعض أو بالكتير ندردش ونفك عن نفسنا شوية ، صحيح أنا ما انكرش ان فى ناس بتستغل الاتصالات دى فى حاجات مفيدة ،وده موجود على الفيس بوك وغيره من المواقع ،فى ناس كتير بتقول معلومات مفيدة وبتتصل ببعضها وتتواصل مع غيرها بخصوص موضوعات مهمة وفعالة ،لكن الأكتر بيستغلوا النت كمصطبة زى مصطبطة خالتى بامبة ، لت وعجن ونميمة وخناقات ، الحاجة المهمة قوى اللى عاوزة أقولها ان المكان الوحيد اللى لسة ما صادفتش فيه الحاجات دى لحد دلوقتى هو المدونات ، كل المدونات اللى شفتها أصحابها ذوقهم عالى وفكرهم مستنير وفعلا بيقوموا بمحاولات جادة لاستغلال الثورة المعلوماتية بشكل إيجابى ، ومن هنا أحب أوجه لهم تحية خاصة جدا ووعد بالتفاعل والتواصل معاهم عشان نفس الهدف ،عشان نتغير للأفضل ونطور مجتمعنا ونغير كتير من مفاهيمه المغلوطة ، ونحاسب نفسنا بنفسنا قبل غيرنا ما يحاسبنا وقبل الأجيال الجاية ما تدفع تمن أخطائنا زى ما احنا بندفع تمن أخطاء أجيال قبلينا ،ياريت كل الناس تحاول تستغل الثروة اللى فى ايديها مهما كانت بسيطة هى بإمكانها تنميها وتتطورها عشان مصلحتها هى والله ،ده لو هى عاوزة 0

إلى كل المدونيين والمدونات على هذا الموقع و "المواقع الأخرى"

أعزائى المدونين والمدونات بعد التحية

أحب أن أشكر الظروف الطيبة التى منحتنى فرصة التعرف عليكم ،كما أحب أن أشكرلكم جميعا تلك الثقة التى تولونها لكل قارىء
و متعة مشاركة عوالمكم الخاصة والحميمة وأخص بالشكر "الصراحة خنقة " وأيوة خدامة "و "قلم رصاص" و"تياترو صاحب السعادة" هذه المدونات المبدعة والمتنوعة شجعتنى على دخول هذا العالم الأرحب كثيرا من واقعنا ، والتى آمل من خلالها بتواصل مع أشخاص مختلفين فى رؤيتهم وأحلامهم ، لعلنا نستطيع جعل واقعنا أجمل وأنفع ، وأحب أن أوضح أن هذه ليست مدونتى الأولى فقد كان لى مدونة على موقع آخر لكن بصراحة الجو عندكم عجبنى أكتر، ولهذا اتخذت الاجراءات اللازمة وحملت همومى وأفكارى وأحلامى وجئت للسكن عندكم ،عندى أحلام بعرض الدنيا ،أتمنى أشارككم فيها وعندى كلام كتييييييير قوى أتمنى أقولهولكم ،بس حبيت فى الأول أعرفكم بجارتكم الجديدة واتعرف عليكم يارب تكون معرفة خير
جارتكم بنت المعز
"الشهرة إنجى همام"