النهاردة وبدون مقدمات، لأ مش النهاردة وبس ده حصل قبل كدة كتيير بس بصراحة النهاردة ولأنى بقى عندى مهرجان أقدر أقول فيه ما بدالى قررت أبوح و أقول ما عنديش حجة للسكات ، المهم نرجع مرجعونا قصدى لموضعنا كنت ماشية فى شارع طلعت حرب سلميان باشا سابقا والحقيقة الجو زى ما لاحظتوا كان مش ولابد كان حر حبيتين وفى الحقيقة جدا بقى يعنى حتى لو ما كانش حر يعنى مهما كان طراوة لأ ده كمان لو كان برد ومطر ورعد كنت هعمل كدة برضة كنت هشترى أيس كريم من " قويدر" إزاى أنزل طلعت حرب وما أجيبش أيس كريم من هناك مش ممكن ،ده أنا كل ما أكون فى الشارع وفي أى فرصة أروح هناك أجيب أيس كريم ما أضيعهاش أبدا وفعلتها وجبت الأيس كريم ومشيت فى أمان الله أكل و أتنعم و أتلذذ ولا كأنه نعيم الجنة فى عز الحر ده، وبعدين خير اللهم إجعله خير خلصت الكوباية وهنا بقى مربط الفرس، النهاردة تحديدا كنت رايحة شارع 26 يوليو ومشيت ومشيت لحد هناك و إنى ألاقى سلة يا مؤمن فى مكان زى ده أبدا ، مكان هو روح العاصمة ومدخلها لأهم مناطقها و أدور و أفتش و أنقب وبعدين نسيت الكوباية اللى فى إيدى وركزت فى المأساة دى و لأنها مش أول مرة بتحصل إفتكرت مرات كتير سابقة مشيت فيها فى إتجاهات مختلفة لمقاصد وشوارع متعددة و برضة لقيت نفس المصير ، والأجمل بقى لو صادفت فى يوم من الأيام ولقيت سلة ويااااااه على حجم الفرحة اللى بيهجم علىً ساعتها و أروح بكل إجلال وتقدير لهذا الكيان الجميل نادر الوجود لدرجة إنى ببقى نفسى آخد جنبها صورة ،فى بلدنا سلة يا ولاد الحلال ومش هروًح بالمخلفات لسلة بيتنا و أروح بقى أحط اللى معايا فى السلة الجميلة ألاقيه بينزل من الناحية التانية أصل السلة يا جماعة طلعت مفتوحة من تحت !!!! المفروض ما أحطش علامات تعجب صح ؟؟ أصل إحنا يا جماعة فى مصر .
إنجى همام
القاهرة / عين شمس
14 يوليو 2010
ليست هناك تعليقات:
إرسال تعليق