امبارح حكيتلكم عن المؤتمر اللى رحته بتاع المدونيين وقلتلكم عن التهمة العجيبة اللى اتكلموا عنها كتير بس فى الحقيقة لسه فى كلام عاوزة أقوله ،كان فى حاجة غريبة تانية لفتت نظرى واستفزتنى جدا وهى آراء الناس اللى انقسمت لنصين ،نص علق على نغمة خليكم شطار وحلوين واسمعوا كلام الكبار عشان نحبكم ونجبلكم حاجات حلوة ولما نقول أو نعمل حاجة أى حاجة يعنى لما نملص ودان حد فيكم ده عشان مصلحة البلد ومصلحتكم طبعا احنا عاوزينكم شطار وقمامير وتشرفونا قدام الدنيا هو احنا عندنا مين غيركم عشان نهتم بمصلحته وكلام كتيييير من النوع ده ، أما النص التانى "هو مش النص بالظبط عشان ما نظلمش حد كان فى شخصيتين تلاتة مش فى أى من الفريقين " المهم الفريق التانى كان بيقول ايه بقى كان بيقول اتكلموا زى ما انتم عاوزين وشايفين واعملوا ما بدالكم مهما كان أو هنتكلم زى ما احنا عايزين وشايفين وما حدش له دعوة خالص "هنشتم ونزعق ونقول كلام خارج احنا حريين اللى مش عاجبه ما يدخلش المدونات بتاعتنا !!والغريب التأكيد على جرأة البنات فى حكاية البذاءة دى أكتر من الولاد عاوزين يثبتوا عكس الشائع البنات خجولة وبتنكسف لأ احنا ناس جامدة قوى ومش من دول مفيش فرق بينى وبين الولد خالص ازاى هو يبقى قبيح وأنا مهذبة وبعدين نقول مساواة وبصراحة البنات فعلا تفوقت ما شاء الله ، لا حول ولا قوة إلا بالله هو يا جماعة الناس ما تعرفش تتكلم بالعقل فى البلد دى أبدا يا أبيض يا أسود مفيش وسط يا وصاية وتلجيم يا قلة أدب وقلة ذوق ، والحقيقة أنا مش عارفة مين الأبيض ومين الأسود الاتنيين أسود من بعض ،بالذمة هو ده النضال !!مش دول ناس جامدين قوى ومقاتلين ومناضلين وقابضين على الجمر هى خناقة فى حارة ؟؟! ليه الناس ما تتكلمش بالأدب ما هو الأدب فضلوه عن العلم والله وبعدين ده احنا ناس سلاحها الكلمة يعنى شىء راقى جدا ومحترم جدا ليه نشوهه ؟؟طريقة الشوم والقباقيب والطرقعة دى مكانها مش هنا أبدا دى شغل البلطجية مش الكتاب ولا حضراتكم ايه بالظبط ؟!
حرام نشًوه أجمل وأقدس رسالة " ا ل ك ل م ة " ، ياترى بلدنا هتكسب ايه لما نسب ده ونلعن ده ونطلع عين أم ده على الورق وبالكلام ، اللى حقيقى يدين الناس الفاسدين تقديم وثائق وحقائق ومستندات تثبت الفساد والظلم والبلطجة لكن بلطجة الكلام عمرها ما تكون رد على بلطجة الأفعال ، وبعدين بقى هما دول المدونيين العظماء اللى سمعتهم زى الطبل فى البلد وتلاقى اللى يدخل على مدونة من دول يلعن المدونيين واللى بيدونوه وفعلا ما يدخلوش المدونة دى تانى ولا غيرها ، هو ده التقدم يا تقدميين ؟هى دى الحرية والثورية ؟! حرام
والله انا شفت مدونات كتير روعة فيها فن تشكيلى وتصوير فوتوغرافى وأدب وفكر ونقد وعمر ما حد جاب سيرتهم ولا عمل لهم هوليلة كدة !مش عارفة أقول إيه بصراحة
كلامى طبعا لا هيعجب الثائرين المناضلين ولا أصحاب الوصاية واللجام ولا هيغير ولا هيأثر فى دول ولا دول ولكن يمكن يأثر فى ناس تانية ويعرفها ان مش كل المدونيين 00000ولا بلاش ،وكمان يعرف جيل جاى ان فى طريق تالت ووجهة نظر تالته ورابعة وخامسة مش يا أسود يا أسود وكمان أنا برضة بقول رأيى وأنا حرة واللى مش عاجبة ما يفتحش المدونة بتاعتى !!!!
إنجى همام
حرام نشًوه أجمل وأقدس رسالة " ا ل ك ل م ة " ، ياترى بلدنا هتكسب ايه لما نسب ده ونلعن ده ونطلع عين أم ده على الورق وبالكلام ، اللى حقيقى يدين الناس الفاسدين تقديم وثائق وحقائق ومستندات تثبت الفساد والظلم والبلطجة لكن بلطجة الكلام عمرها ما تكون رد على بلطجة الأفعال ، وبعدين بقى هما دول المدونيين العظماء اللى سمعتهم زى الطبل فى البلد وتلاقى اللى يدخل على مدونة من دول يلعن المدونيين واللى بيدونوه وفعلا ما يدخلوش المدونة دى تانى ولا غيرها ، هو ده التقدم يا تقدميين ؟هى دى الحرية والثورية ؟! حرام
والله انا شفت مدونات كتير روعة فيها فن تشكيلى وتصوير فوتوغرافى وأدب وفكر ونقد وعمر ما حد جاب سيرتهم ولا عمل لهم هوليلة كدة !مش عارفة أقول إيه بصراحة
كلامى طبعا لا هيعجب الثائرين المناضلين ولا أصحاب الوصاية واللجام ولا هيغير ولا هيأثر فى دول ولا دول ولكن يمكن يأثر فى ناس تانية ويعرفها ان مش كل المدونيين 00000ولا بلاش ،وكمان يعرف جيل جاى ان فى طريق تالت ووجهة نظر تالته ورابعة وخامسة مش يا أسود يا أسود وكمان أنا برضة بقول رأيى وأنا حرة واللى مش عاجبة ما يفتحش المدونة بتاعتى !!!!
إنجى همام
ليست هناك تعليقات:
إرسال تعليق